அறபிமொழி பேசும் யூதர்களும், கிறிஸ்தவர்களும் தமது கடவுளை ஏன் ‘அல்லாஹ்’ எனும் பெயர் கொண்டு அழைக்கிறார்கள்? இந்தக் கேள்வி நம்மில் பலருக்கு ஆச்சரியத்தைத் தரலாம். முஸ்லிம்களின் கடவுள் பெயர்தானே ‘அல்லாஹ்’. அந்த ‘அல்லாஹ்’ எனும் பெயர் கொண்டு ஏன் அறபிமொழி பேசும் பிற மதத்தவர்கள் தமது கடவுளை அழைக்க வேண்டும் எனும் சிந்தனையையும் நமக்குள் உண்டாக்கலாம். அதற்கான விடை இதுதான்: ‘அல்லாஹ்’ எனும் அறபி வார்த்தைக்கு தமிழில் கடவுள், இறைவன் எனும் பொருளாகும். இஸ்லாமிய மரபின்படி எல்லா மொழி பேசும் மக்களுக்கும் இறைவன் அம்மக்களிலிருந்தே தனது தூதர்களை அனுப்பினான். அவர்கள் தம் மொழியில் இறைவனைக் குறிக்கும் பெயர்களிலேயே மக்களுக்கு இறைவனை அறிமுகப்படுத்தினார்கள். இவ்வாறு ஆப்றஹாம், மோசஸ், இயேசு என அனைத்து தூதர்களும் தமது மொழியிலேயே இறைவனை அழைத்தார்கள். அவ்வரிசையில் இறுதியாக வந்த முஹம்மது நபி அறபி மொழி பேசியதால் அம்மொழியில் இறைவனை குறிக்கும் ‘அல்லாஹ்’ எனும் வார்த்தைக் கொண்டு அழைத்தார். ஒருவேளை முஹம்மது நபி தமிழ் பேசும் சமூகத்தில் பிறந்திருந்தால் இறைவன் என்றோ கடவுள் என்றோதான் அழைத்திருப்பார். அவ்வாறென்றால் முஸ்லிம்கள் அல்லாஹ் எனும் தனி ஒரு கடவுளை வணங்கவில்லையா என்றால், ஆம். முஸ்லிம்கள் வணங்குவது நம் அனைவரையும் படைத்து பரிபாலிக்கின்ற அனைவருக்கும் பொதுவான இறைவனையே. பிறகு ஏன் அல்லாஹ் எனும் அறபி மொழி வார்த்தையைப் பயன்படுத்த வேண்டும், இறைவன் என்றோ கடவுள் என்றோ அழைக்கலாமே. ஏனெனில், அல்லாஹ் எனும் அறபி வார்த்தைக்கு பாலும், பன்மையும் கிடையாது. அதாவது ‘இறைவன்’ எனும் வார்த்தையை ‘இறைவி’ எனும் பெண் பாலாக மாற்ற முடியும். ‘கடவுள்’ என்ற வார்த்தையை ‘கடவுள்கள்’ என பன்மையாக மாற்ற முடியும். ஆனால், அறபி இலக்கணப்படி அல்லாஹ் எனும் வார்த்தையை இவ்வாறெல்லாம் மாற்ற முடியாது. இஸ்லாம் கூறும் ஓரிறைக் கொள்கைக்கு நெருக்கமான ஒரே வார்த்தை ‘அல்லாஹ்’ என்பதாகும். திருக்குர்ஆன் அல்லாஹ்வை பின்வருமாறு எழுத்திலும் முஸ்லிம்களின் உள்ளத்திலும் பதிவுசெய்துள்ளது. கூறுவீராக! அவன் அல்லாஹ், ஏகன். அவன் யாருடைய சந்ததியும் இல்லை; அவனுக்கு யாரும் சந்ததி இல்லை. மேலும், அவனுக்கு நிகரானவர் எவருமே இலர். (திருக்குர்ஆன் 114: 1-4) இன்னும் இஸ்லாமிய மரபு அல்லாஹ்வை அழிவற்றவன், அதிகாரம் மிக்கவன், வணங்குவதற்கு தகுதியானவன் என பல தனித்துவமான வர்ணனைகளால் பதிவு செய்துள்ளது. அவ்வளவு ஏன், அல்லாஹ் எனும் கூறும்போது எந்த உருவமும்கூட நம் மனப் பதிவில் வருவதில்லை. இப்பொழுது கூறுங்கள் அந்த மிகப் பெரியவனை அழைக்க ‘அல்லாஹ்’ எனும் வார்த்தையை விட வேறுசிறந்த வார்த்தை ஏதும் உள்ளதா?